مشاركات الزوار ››
نافذة الفيوم.. يامصري
يامصري

اضيف في يوم 2012-01-12 .. مشاهدات[172]

بقلم / إسلام أحمد

يا مصرى قوم كمل اللى بدأته

واوعى حد يقتل حلم حلمته

واوعى تيأس وتقول الدنيا ظلمه

فى شعاع نور ظهر انت اضأته

وفى خير كتير بس انت ركز

وبلاش تفكر فى امبارح اللى دفنته

بكره احلى خلى عندك امل

وشد حيلك وسيبك من اللى حرقته

هى الثوره قامت ليه ؟! ليه ؟!

عشان نشم نفسنا ولاّ

حد تانى على راسنا يدوسنا

ولا حد يضرب فاكرنى هقوله كمان

لا ده كله كان زمان

ولا حد يشدنى ع القسم من غير سبب

وانا اسكت وكأنه قدر واكتب

ولا حد يزّور قدامى وكأنى مش موجود

ومش شايفه وآآآآآآآآآآه من العجب !

ولا ايه ولا ايه ولا ايه

 

الثوره حصلت وما حدش كان مصدق

ان الريس بتاعنا يفك ويزهق

ويقعد يتحايل ويقول حقكم عليا

مش هعمل كدا تانى 

طيب يلا نبدأ

افرح يا مظلوم

فى 18يوم

كرامتك رجعت تانى

ياريت تقوم من النوم

 

اوعى تكرر اللى حصل زمان

وتسكت زى جدودك وكان يا ما كان

كان فى واحد فرط فى حقه

وقدامه اللى نهبه وسلبه

لكنه خاف يتكلم

وسكت وقعد وسلم

لحد ما الحرامى كبر

وبقى غول واتضخم

وما حدش وقف قصده

وافتكر انه مللك الكون

وما حدش هيقدره

وهاج زى المجنون

يضرب ويشتم ويسرق

وينهب من المخزون

لحد ما اتفقرنا

وجيوبنا فضت وبنشحت

ونفسنا اتكسرت

ومن اللى هب ودب

بناخد على قفانا وبنسكت

اوعى حفيدك ياجى يسألك فرطت فى حلمك ليه ؟!

فاكر انه هيكمل

وانت زى البيه ؟!

اوعى حفيدك ياجى يقول

الله يسامحك يا جدى

فرط فى هدف كان قدامك

وباقى له خطوه ويعدى

يا مصرى قوم كمل اللى بدأته

واوعى حد يقتل حلم حلمته

واوعى تيأس وتقول الدنيا ظلمه

فى شعاع نور ظهر انت اضأته

 


يتم التحقق من المدخلات.فضلا انتظر قليلا
√ أضف مشاركة
الحقول التي تحمل علامة النجمة * إجبارية.
الأسـم * :
البريد الالكتروني* :
موقعك الالكتروني:
البلد:
عنوان المشاركة *:
الرسالة *:
تعليقات القراء

تعليقات (0)

جديد القسم
› يامصري
› "المجلس".. وسياسة "فوضى تحت التحكم"
› مشاعر مصري :
› لا تتركوها لحكومة يعقوبيان
› لامش إيد واحده..علي بكري